أصيب في ظني بالأيام وأخيب وأشبه معاني وأختلف في معاني وأقف على حد الرجا والمكاتيب وأمشي ورى قلبي وأنا في مكاني من يوم ما غيب شبابي ترى الشيب وأنا أتخيل دمعته لابكاني ومن ضيقة الخاطر وقل الأصاحيب بان التعب حتى بنظرة زماني لو كانت الحاجة تعرف المواجيب ما خلت الطيب وراها يعاني ومن كان بالدنيا قليل التجاريب يشوف هزلات الليالي سماني بعض القصيد احيان نقص وعذاريب ما له حضور ولا شعور ومواني وبعض القصيد اليا حضر له معازيب وإن غاب أقصى غيبته بالمحاني مثل المسافة والظما والمشاريب نقرب وتبعدنا حدود الأماني صراحة الطيب وشرهة هل الطيب عندي معزتهن معزة إخواني وياللي على الفرقا كثير المطاليب ليتك قبل لا تروح تصبر ثواني البعد بعد القلب لا شك لا ريب الحب الأول ما يعوضه ثاني وفرقا المعاند ما وراها مكاسيب كلمة وقايلها بعظمة لساني يجوز يقوي قلبك البعد ويغيب لكن يبي يبطي وهو ما نساني
