الشمس

ماجنيت الشمس في وقت الغياب
واستغليت الليالي والغروب
كفي الممدود في وجه الضباب
قشع الظلمه وانار إبها الدروب
صاحبي مايلحقك مني عتاب
ولايطفي شعلتي منك هبوب
ولو عوى في رجم مداتك ذياب
ماتعشى منك فضلات الشبوب
والمطر لو كان من يدك انسكاب
مااكتسى وجهي ملامح من شحوب
مدتك دايم من اوهام وسراب
وانا من طرد السراب اقلع واتوب
منجلك مايحصد إلا بالخراب
وانا ارضي كلها خضره وحبوب
مااستوى صدقي مع كذب وعذاب
ولاتساوى بسمتي وغدر النيوب
ضاعت سنيني وكله بإحتساب
عند والينا وعلام الغيوب