«كاس مُر»

ليه لا من أدبرت تدبر جميع
كن بين الهم والضيق اتفاق
بينهم صبري غدا مثل الصريع
في يديه وثاق واقدامه وثاق
كنت اقول اليا ارخصوها ما ابيع
وان تنحوا ما جزعت مْن الفراق
وان حملت بيوم ما لا استطيع
قلت فيه اللي حمل ما لا يطاق
كنت اذا يآمر زماني ما أطيع
لو سقاني كاس مرٍ ما يذاق
ثم صرت لسطوته مثل التبيع
مذعنٍ ينساق للي له يساق
لاني بمأمن ولا حصني منيع
النظر خيفه، وسمعي استراق
ضاق كونٍ كان في عيني وسيع
والسما ما كنها سبعٍ طباق
السنه كل الفصول إلا الربيع
والشواطي كل لون إلا الزراق
بين حظٍ طامن وحلمٍ رفيع
وبين ناسٍ بالأذيه في سباق
لا ظهر في وحشتي وجهٍ وديع
صابهم من شدة الغيظ اختناق
جايزٍ في شرعهم حقي يضيع
ربما حزني لبعض الناس راق
ما أبي منهم شفاعه أو شفيع
وْلا ذِكر بالخير والا اشتياق
كفهم معروف والصده صنيع
لا يزيدون الحرايق احتراق
الصبر من دون رميتهم صريع
وبْيدينه ما بقى موضع وثاق