ابن الشهيد

‪
دوبه بدا بدع البيوت وزان جوك يالقصيد
أشرت لبيوتك وغنت لي على موالها
وشوش وأجي وانتهض واخذ من الجزل الجديد
نقاوةٍ تطرب مسامع من صغى وأوحى لها
فالمحفل اللي فيه تكريم ووفاء لإبن الشهيد
من باب قدر الناس ننزلها على منزالها
وابوك نفخر به من الامجاد له مجدٍ تليد
لشهيدنا القمة وتحلا له وهو يحلالها
يشهد له الحد الجنوبي كان له باس شديد
من دون حد المملكة وسهولها وجبالها
يدخلهم الله جنة الفردوس فالعيش الرغيد
في رحمة الله والقيامة ما يحسب اهوالها
في صفحة التاريخ يرويها الابن على الحفيد
قصص بطولية تنومسنا فعول ابطالها
وحنا جسد واحد مشاعرنا العطى فيها يزيد
وحنا التراحم ولكم انقل صورة من اشكالها
وحنا التكاتف واجتماع الراي والحبل الجويد
في حكم دولتنا الرشيدة نستظل ظلالها
نفخر تحت راية ملكنا راعي الراي السديد
قائد محنك والا عادي شاربٍ فنجانها
حط له ربي هيبة عند القريّب والبعيد
وحتى الملمة لاقبلت من قو بأسه شالها
ونعرف حنا ما يفلك يالحديد الا الحديد
المملكة في ظل سلمان الحزم ورجالها
نامي بامان الله ياداري تحت حكمٍ رشيد
يالديرة اللي عزها طول الدهر يبرالها
في ذمتي حبك ملكني من الوريد الى الوريد
يا دارنا اللي لو يطول الوقت ما أنسى أفضالها