مذكرات بلقيس الشعر

يجول بداخلي صوت عجزت استجمع حروفه
عجزت اعرف اذا هو نزف والا عزف او حيره
ايا حلمي القديم اللي غدى حضنه من رفوفه
كتابٍ من كثر هجر البشر مليان تغبيره
انا الناي وضحالة فكرهم يسلبني معزوفه
غريبٍ ترفضه اوطانه وتتفنن بتهجيره
سألت الصبح عن طول الظلام وضيمه وصروفه
وشاح ودلني أبهام وغموضٍ في تعابيره
انا لامن ظميت وصالهم والنظره مخطوفه
فياكم وردوني للجفاف وحر تسعيره
وكم يمنعني الصاحب سناه ان صرت مكفوفه
وكم يسقيني هماجه ويدس زلاله في بيره
واذا طحت بخطاي العاثره طبل على دفوفه
تكشف معدنه وسوء النوايا وخبث تفكيره
انا لي فم صداح بموسيقى ودبكه مصفوفه
وللحاسد نشازه وطبلته ودخانه وكيره
تمخض واقعي عن زهرةٍ بالشوك محفوفه
انا طبعي كذا ورموز سحري وحدها سيره
ورغم طول العنا وضيم الزمان وقسوة ظروفه
معي عرشي الممرد من رخام ومن قواريره
وانا بلقيس شعر ولو جهلني البعض معروفه
وصرحي ان تهت ولاحرت كان لغربتي ديره
طويت الدرب ولاهو طواني دون ما اشوفه
تصبرني فصاحة منطقي واقول ذي خيره!