لآلئ شعرية

عليك الفرج ياالله يا حي يا قيّوم
إلهٍ عباده كلها تلتفت يمّه
ألا يارفيقي والله إنه عداك اللوم
أنا اللي علي اللوم في ذمتي ذمه
ولكن سامحني ترى العلم فيه علوم
ولا يفرح اللي بيننا ينقل النمه
حصل ماحصل والعبد يصبر على المقسوم
يدور الزمان ويخلف العزم والهمه
طرات الرجل لا لحقه من الزمان هموم
ما يدري بسده كود خيرة بني عمّه
وسيع البنايد في الشدايد قوي عزوم
لا عظك زمانك شال همّك مع همّه
وأنا والله إني ماتهنى بحلو النوم
ورفيقي عليه هموم الأيام ملتمّه
أشيل الحمل منه وأحطّه علي وأقوم
مقام يورد مظمي الما على الجمّه
لكن الزمان الشين ظالم وأنا مظلوم
على الهون ياللي تمدح الوقت وتذمه
تهب الهبايب والسفن في البحور تعوم
وتقفي بها صلف الهبايب عن اليمّة