لآلئ شعرية

إن طاعك الوقت والا.. لا تمادى طعه
اكفان الاحلام قد الصمت.. والصبر خام
وانا على قولة اللي ما يعيب دلعه
كثير اجامل.. وعندي مشكلة بالخصام
يقول: كن القدر بالحب معك بسعه
على اثر خطوتك.. نضيع بين الزحام
من كثرك.. اكثر قلوب الناس عندك دعه
ومن طولك.. الله رزقك من السحاب الغمام
وانا وهو صادق.. الأَبواب لي مشرعه
لو ان حوله تدور.. اصابع الإتهام
والا الحقيقة لبعض قلوبنا موجعه
نقتاد خيل المحبّة لطف.. دون انسجام
اقول انا: انت حبر اقلامي المبدعه
ويقول: يا ثالث الأَعياد.. ولكل عام
حسبي على جنون قلبي.. ليه كنت امنعه
من قبل ما تنضج احلامه وقبل الفطام
والعاشق اللي يزيد الشوق فيه ولعه
ما يقدر العاطفه.. ولا يفيد اللجام
لو شاف قلبي ليا هب الهوى وشلعه
ما قال لي: ليه؟.. واحواله على ما يرام