الغيوم

بعض الغيوم بجونا تحجب الشمس
والجو لا ممطر ولا هو بغايم
وقول الحقيقة يا بشر صار بالهمس
والكذب سووا له صروح وولايم
يحمس لهيب القيض كبودنا حمس
وبرد الشتا في ضلوعنا له صرايم
تقطعت فينا السبل وابعد الرمس
ما بين متعنت ومخطي ولايم
ندرى جروحٍ نزفها ماحتمل لمس
وفي جونا غربان تدعى حمايم
تدرى وش اللي يجلي الخاطر العمس؟
ويبريك من بعض الجروح السقايم
شوف النفل في خايع ماطره امس
واليوم ريحه اختلط بالنسايم
يالله تثبتنا على الدين والخمس
وياالله عسانا ننصر الحق دايم