يهتويك الشعر..

واهني ليلٍ بجفنك تسهرينه
من يلومه لو يطول ما ينام
وواهني صبحٍ يفتح فيك عينه
لا ابتدى عمره بشوفك واستهام
إلتفتي له وسادت به سكينه
وابتسمتي له وصوت بالغمام
قال غط الشمس عن وجه المدينه
دام حلت تلعة الجيد اللثام
نورها اللي بان من غرة جبينه
نوض برقٍ بالسما يجلى الظلام
من حصل له منك نظره تفتنينه
ومن تولع فيك عداه الملام
ومن شرب همسات حكيك تجذبينه
لين يروى من شهاليل الكلام
المزن شافك وبيحتي كنينه
والهوى نشك وطاب من العسام
ذاك يسقي كل دربٍ تسلكينه
وذا يهفهف فرحةٍ بك للانام
لذة الدنيا بطلاتك رهينه
كنك الما من عقب طول الصيام
خذتي من الحسن ما تملك يدينه
ومن جزيل الشعر جل الاهتمام
يهتويك الشعر لو ما تهتوينه
حيث يبلغ في وصوفك له مرام
كل بيتٍ يقصدك يصدح رنينه
دام وزنه في ملامحك استقام
في عيونك خيل وسيوف سنينه
تذبح برمش مثل ريش النعام
ودام مابه غير وجهك تشبهينه
ما على الشبه اربعين الا السلام