العمر رحلة

ياللي عليك من الخيانه علامات
تضحك بوجهٍ صاحبك ما يغرّه
ان طعتني هوّد بلاش الحركات
لله در الوقت لله درّه
خلاني احدد وجيه العلاقات
وجه المسره غير وجه المضرّه
اثقل عليه من جبال السروات
صد الرفيق اللي علي ايتشرّه
الوقت وردنا الدروب العسيرات
اللي يمر بها الحنين وتمرّه
احيان ادور لي من الصبر فزعات
واحيان اصد القافله عن مقرّه
واضحك وصدري دون غيبه مجرات
من عاد يقطعها مجره مجرّه
لو انّي امن الضيق في بعض الاوقات
ارجّع شماغي وافكّ الازرّه
العمر رحلة والليالي مسافات
والموت ياخذنا على حين غرّه
واللي دهى قلبه من الضيم لوعات
يموت قلبه هم ما مات حرّه
اكثر صداقات الخلايق شعارات
ما تازن من الصدق مثقال ذرّه
اللي تحملّه حمولٍ ثقيلات
يصبر لجور الوقت برده وحرّه
بكره يعدي فالجبال المنيفات
ويحدّث اعن الوقت حلوه ومرّه
للضيق حزاته وللحلم حزات
على القلوب وكلها مستمرّه
واليا انحنت هامات ما طاح هامات
على كفوف الكون بحره وبرّه
من تدحم جنوبه جنوب المهمات
يجي له مع الهم كره وفرّه
صدر الغضب تدميه سطوات الآفات
وصدر الرضا تغنيه كف المبرّه
وحنا نوردها المخاطر محيمات
وتعود منها ما محى الياس جرّه
من دون غايتنا للاسباب غايات
والوقت خيره ما يقارن بشرّه
صدت بنا وجيه الليال المحيفات
اللي علمها بالمصايب تشرّه
ونصارع الدنيا بهمة وهقوات
رغم الضروف اوضاعنا مستقرّه