أهل الوفا

لا تصك بابك في وجيه المعاسير
اللي عنولك من صدوف الليالي
فرج عليهم وافعل الطيب للغير
لا صار عندك خير وعندك مجالي
ولا تعتذر ما هوب وقت المعاذير
لا حزّة الحزّة تبين الرجالي
الرزق عند الله ولا في البخل خير
وقيل الكريم معان ياللي تبالي
قبل امس ضايقني على حزة عصير
قرمٍ بفعل الطيب مضرب مثالي
يشكي من الدنيا ودمعاته تسير
والهم فوق الراس كبر الجبالي
يقول وين القى الرجال المناعير
اهل الوفا والطيب.. كرام السبالي
عسكر علي الهم وكل ليله يغير
يا وجد حالي ما قويته لحالي
ويا كثر ما دارت علي التفاكير
واحس كنّي فوق جرف ٍ هيالي
والنفس امنيها بالاحلام وتحير
اثر الاماني ما تحقق منالي
ولا بد ما نرضى بحكم المقادير
ونصبر على اللي قدرّه ذو الجلالي
ومن جرّب الحاجة ما يحتاج تفسير
لا ذاق مثل الكاس مرٍّ وحالي
واقفى وحزن القلب ورد ومصادير
تبّت يدينك يا قصير الحبالي
ياللي عن المحتاج صر الدنانير
مصير مالك للفنا والزوالي
ومن لا كسب للطيب من عاده صغير
يصعب عليه يحوش روس الطوالي
يالله ياللي تشبع الذيب والطير
ياماخذٍ من كل وصف الكمالي
ارزقني الحكمة و حسن التدابير
واجعلني ابيض وجه لا جا مجالي