عز العرب

حنا معك ياسيدي سلمان ياعز العرب
قدنا على كل الدروب اللي تبي نمشي بها
حنا دروع الدار وحزامك ليا حان الطلب
حنا الرجال اللي نهار اللازمة تغزي بها
معك معك ياسيدي قدام لا ثار اللهب
تشوفنا قدام عينك والعزوم نجيبها
الدار هذي دونها الشجعان وكرام النسب
ما للمواقف غير هقوتها وفزعة طيبها
إي والله انا مانهاب الموت ساعات النشب
لين الحدود نعيد في عون الولي ترتيبها
حنا هل الدين الحنيف ان جات حزات الندب
فزعاتنا يابو فهد كل الدول تدري بها
ما للمعادي عندنا إلا الرمح والسيف الحدب
وسلاح جوٍ لا زهمته جاك يقنب ذيبها
اما خذيناها رضا والا خذيناها غصب
اعمارنا للدار نجلبها وننسى غيبها
حنا سعوديين مانندار لا دار المهب
نشوش من زود الطناخة والعدا نسريبها
واليا زبنا الجار والمضيوم يبشر بالشبب
لين العزاوي في مراقيب السعد نومي بها
نقدم على بيض النوايا جند وكبار الرتب
والارض هذي مانبيع بها ولانشري بها
على ولاء الاجداد والاحداث ببطون الكتب
افعالنا التاريخ يحفظها ويظهر طيبها