عطني علومك

اشياء واجد أضيعها ولا القاها
ولا اتحسف عليها لو تعداني
ولا انتظرها ترد ولا اتباطاها
حسافتي ما تجي في شي خلاني
انا رجل عارف الدنيا وجدواها
واشوف فعلي كبير بعين عدواني
النفس متراميه وابعد شظاياها
الباقيه مني والباقي من احزاني
أحيان تقدر علي وأحيان أقواها
واحيان اقول اصبري اذا الله احياني
ببدا حياتي وابستقبل عطاياها
واضحك على اللي يقول الحظ جافاني
واعيني اللي تشح اليوم في ماها
ما هزها غير توديعي لخلاني
يابو عيونٍ تجيب الرزق وياها
أقفيت عني ولا ادري منهو الجاني
طعونك العام قلبي من ضحاياها
واطيب كل ما ذكرت ان العمر فاني
ماني بزعلان لا جتني بذكراها
الله يبارك لها، ويعز نسياني
يا مرحبا بك من اتلى الروح لاقصاها
ترحيبةٍ جات من قلبي على لساني
اقلط على دلة الشوق وتقهواها
لا هز فنجانك ولا تهز فنجاني
وعطني علومك من اولها الى اتلاها
ولا تفكر من اللي ضيع الثاني
لبيه يا عيونك الثنتين محلاها
لبيه لا سلهم الرمش وتحداني
ابنهزم من عيونك من سواياها
وهزيمتي نابعه من دافع انساني
غيبتك واسبابها قمت آتحاشاها
شريت راسي وبعت الهم واحزاني