عالم غريب

بطيت آقالب هاجس الفكر طايعه
وأفكر بوقتٍ مضى في روايعه
أشوف شي منه ما عاد سرني
يا زين وقتٍ فيه الأفواه جايعه
الناس مجموعة على الحب والوفا
ما فيهم اللي ناشزات طبايعه
قلوبهم وحده وواحد مصابهم
صف بوجه الفقر وابشع صنايعه
واليوم مغنيهم من الخير خالقي
وقلوبهم من شدة الحزن مايعه
يمشون والدنيا الدنيه تضدهم
يا كثر ما يشكي المعنى وجايعه
كلٍ يهيم وما عرف فين وجهته
وكلٍ مضيع من رداته ودايعه
كلٍ تبدل طبعه وحسن سيرته
خلق ٍمشوه فيه الاحقاد شايعه
لا عاد به خير من الناس يرتجى
ولا خير فيمن دينه ابخس بضايعه
حقايق من هولها شيّب الفتى
حتى ولو قارب وسدد ذرايعه
ومصايبٍ تنحاك في حالك الدجى
هذا يكيد وذاك بلواه شايعه
عالم غريب وعشت معهم بغربتي
وكل النفوس ليا دنا الموت بايعه
فيا رب ثبتني على الدين والهدى
ولا حان نزع الروح خفف نزايعه
واغفر ذنوبي يوم تعلم سريرتي
وأنا على النهج القويم وشرايعه
والحقني بخير البرية ونجني
وأمنّي بيوم كثيرة روايعه