قال إن الاسمري "مغطي" على الكل.. فيصل اليامي!

مهاتفة

مهاتفة.. مساحة تنقل مكالمة هاتفية مع أحد الشعراء. كما جرت دون أي رتوش..
وهذا الأسبوع مهاتفتنا مع الشاعر المعروف الصحفي في جريدة "الرياضي" الزميل فيصل اليامي..
@ ألو
هلا والله.
@ الشاعر فيصل اليامي؟
أي نعم.
@ ممكن نأخذ من وقتك شوي؟
آمر يابوي.
@ من كان يكلمك قبل مكالمتنا؟
الكاتب الساخر مسلي آل معمر.
@ وش عندكم؟
هو والشاعر نواف الدبل يعزمانني على العشاء.
@ وكيف علاقتك مع الشاعر نواف؟
أحلى علاقة مصلحة في العالم!
@ وين رايح؟
ادور عن مطعم نتعشى فيه.
@ وينك مختفي الأيام اللي راحت؟
توني جاي من خارج المملكة.
@ ترى القراء مشتاقين لصفحتك؟
ان شاء الله الاربعاء الجاي بيقرونها.
@ في تغييرات بالصفحة؟
احنا دايما نبحث عن الأفضل.
@ يعني بتطلع بشكل مميز بعد هالإجازة؟
أتمنى ذلك.
@ بس يقولون ان صفحة "جدايل" غطت عليك؟
صفحة "جدايل" زي ما أنت عارف يعدها الشاعر عبدالله الأسمري وهي مغطية على الكل.
@ ليه الشعر يتوقف في الصيف؟
كل شي يوقف في الصيف لان الناس ماخدين اجازة.
@ أنت أخذت اجازة من الشعر؟
ما أقدر اخذ اجازة من الشعر لانه الهام يجي في أي وقت وأنا أقصد الفعاليات الشعرية مهوب الشعر نفسه وإلا الشعراء ما يقصرون.
@ طيب ما يقل انتاجك الشعري بالصيف؟
لا أبدا.
@ شكرا لك.
لا شكر على واجب.
@ مع السلامة
الله يسلمك.