ركاب فكري

عبس وجه الزمان برحلتي والفود ما من فود
... ...سوى جرح يلازمني وخوف الوقت واحزانه
تلقيت الخلا واثر الخلا ما ياوي المقرود
... ...وضاق الجو فيني وذبلت بالحيل ريضانه
اخايل فالرعود اللي تصاعق كنها البارود
... ...وبرقٍ له زمن عيا يبين وتمطر امزانه
اسوق ركاب فكري للهموم وتركب المشدود
... ...وشفت الهم بهمومه يطارد هم ديانه
انا في خارطة كوني غريب وتايه ومفقود
... ...انا مثل الذي ضيع غلا ربعه وصدقانه
انا صابر على هم الزمن مثل الهدف مرصود
... ...على شان العيون اللي تقول عيون شيهانه
لو اني للخطر والموت وضيقات الزمن محدود
... ...لو ان القلب هاجوس الزمن قصره وميدانه
سعد مزيد القاطع الخالدي