قصيدة فلسفة شاعر لمعجب الصقيري .

الحمد لله عالم الغيب ...و ..كفى
اللي خلق عبده من الماء المهين
قبل ابتدي بالهرج وانسى المصطفى
صلو على محمد إمام المرسلين
الهرج واجد لو نقوله ما كفى
والحق واضح كنه النور المبين
الخير مات و عقبه الشر إحتفى
في حضرة الشيطان وإبليس اللعين
والطيب روّح في طريقه واختفى
بين البشر روّح زمان الطيبين
ياكثر طعنات الحبايب بالقفى
وياكثر صكات الغدر وسط الجبين
أحيان احس إن الخيانه هي وفا
وأبكي مع الشيعه على موت الحسين
وأحيان أشوف الوصل من عقب الجفا
ماينفع اللي راح في غزوة حنين
ولا شفت نور الحق في عيني طفى
ارجع واقلّب في رياض الصالحين
واستغفر الله من شياطين الخفى
اللي تضل الادمي عقب اليقين
لو كان يالعطار بعلاجك شفا
ما نامت الدمعه على الخد الحزين
يموت رجالٍ على كلمة افااا
لاصار غصب عنه مكتوف اليدين
ليه الحزن يالشام من فوقك ضفى
ليه البكاء والدمع يأهل الرافدين
نضحك وحزن الوقت توّه ماغفى
نبكي ولكن مانفع عبر السنين
غطيت جرح الوقت لكن ما دفا
وهزيت غصن الشوق من كثر الونين
والعفو عند المقدره ليته عفا
ليته يطيّب خاطري في كلمتين
هي فلسفة شاعر نقش فوق الصفا
والا سوالف ليل من كثر الحنين
ياماضي الذكرى لو الواقع نفى
حلمٍ قريته في رواية مجدولين
ما يصلح العطار عمرك لا هفا
أقرب لنا يالموت من حبل الوتين
الشاعر السعودي : معجب الصقيري - تيما