غنّي يا أماني

ما بين دمعه وبسمه تاهت العين
أحسن كذا.. بس خليها أماني
بتمرك أيام وسنين وعناوين
وتغيرين الأماكن والمواني
كذا كذا أيامنا حتى الفرح دين
لازم كذا مثل ما نفرح نعاني
ولا تسألين الفرح متى يجي وْفين
مثل الشعر ما سألته كيف جاني
بيجيك بعدين لا.. لا.. يمكن الحين
ويموت هذا الحزن ويكون فاني
يا غيمة العشب يا بوح الرياحين
يا وردة القلب يا كلّ الأماني
وها الصامت الناطق اللي يجمع اثنين
يصير فيه الحنين احساس ثاني
يرتب احساس راقي بين شخصين
وتمر ساعات نحسبها ثواني
خلي الفرح يا أماني يغمرك لين
يصير وقتك تفاريح.. وأغاني
غني معي يا أماني ليل يا عين
يا لليل يا عين غني يا أماني