الطرقي على فاله

عليك ما أشره ولا أعتب وأكتئب وآهيم
أشرب من النهر والا أجلس على جاله
ثنتينهن تغني الخاطر وتبري الضيم
وتهيّض الطرق، والطرقي على فاله
يا أرقّ واعذب شفاه تنادي ابراهيم
يروح لك فدوه ابراهيم وعياله
يمر صوتك على صحرا ضلوعي غيم
إن هلّ.. والا يردّ الشمس بظلاله
يا موتي إليا طرحتك بين سين وجيم
واحمرّ خدّك وصوتك بحّت حباله
وآنا اتبسم وفي صدري هبوب وديم
يوم انت يدّك على صدرك وسلساله
إلين ما تبتسم لي بسمة التسليم
أموت وأحيا على هالموقف لحاله
غمازتينك تكفّي ياشبيه الريم
تقول شيٍ يموت الشعر ما قاله
أنت ابتسم لي وآنا آبوعدك ما اهيم
باقرب من النهر وآبجلس على جاله