حلم المسافر

ثارت وساوس صدرك المستبدّه
لا دمعتك طاحت ولا نمت وارتحت
همّك لحاف، وذكرياتك مخدّه
بالذكريات أمسيت وبهمك أصبحت
ودوّامة أفكارك على خط جدّه
حلم المسافر يوم لوّح ولوّحت
هذا رجوع اللي رجع بعد مدّه
والا وداع اللي على فرقته صحت
في زحمتك معْ نفسك ابنه وهدّه
«شعرٍ» يماري فيك ان جيت وان رحت
قل للطموح: انك مع الصبر قدّه
وْقل للجروح: انك نسيت وتسامحت
وقل للأحبّة: وصّل الحب حدّه
نفس الشعور بلحظة اْحزنت وفْرِحت
وْحبل الوصل لو يرتخي لا تشدّه
ما كل صاحب يرتكي لك ليا طحت
ما هي ضعافة نفس حفظ المودّة
يبقى محلّك فوق ومحِلّهم تحت
«بابٍ» يجيب الريح لك لا تسدّه
في دربها تاخذ بعض ما تبجّحت
منك وعليك ودين لازم تردّه..
عبورك بدنيا بسرّك لها بحت
لا تفكّر تفكّر وعمرك تعدّه
هذا قدرْك اللي معْ امره تصالحت