بشّرتني فيك.. من شفت المطر / عبير بنت أحمد

الرياض اليوم.. ماهيب الرياض
أرضها لوتس، ونسمتها عطر
والسماء صبّت على الصحرا فياض
بشّرتني فيك.. من شفت المطر
أشبهك مير انت طاغي بالبياض
وتشبه أحلامي إلى حد البطر
والغريبة، يوم شعري فيك هاض
مافرقت أي ٍ كتب فينا الشطر
جيتني والقلب ما أبدى اعتراض
رافع ٍ حد الغلا فوق السطر
مرحبا يا وارد انهاري حياض
مرحبا لو دق ناقوس الخطر!
قدّ ما يدّيني امتّدوا عراض
من هنا.. حتى تلامسني قطر
كم يجيني وانسحَب خالي وفاض
وكم عليك القلب فالصغر انفطر
رجعتي للحب عقب الانقراض
ما يوازيها سوى عيد الفطر
يابعد كل الحبايب فالرياض
أعطني اللوتس .. وخذني لك عطر