أفرحي مادام حبي لك إلى حد الجنون

واسعدي مادام ما بالقلب غيرك يعشقه
(أيه منك وفيك شفت العمر ياالقلب الحنون)
قالها عباس قبلي بالهوى يا مصدقه
أقتبس لك من جزيلات المعاني والفنون
واقدح من الراس شعري والمشاعر مشرقة
مثل طلتك البهيّة ساحرة كل العيون
وسلهمتك اللي تضيع كل عقل وتسرقه
والشفايف والخدود ونظرة ورفّة جفون
وفتنة الغمازتين اللي فؤادي تفتقه
مثلها شعري يكون أو يا عسى ماهو يكون
كان ما جبت الجزيل بكل طرقٍ أطرقه
وكان ما ضحيت في عمري لاجل طرقا فتون
وكان ما هزت الطوال وكل عدّاي اسبقه
كلّها لعيون غادة حسنها هز السكون
من فؤاد وروح لعيون الغلا متشفّقة
عبدالله بن حمود المزيني