عواكيس

* صحيح يامعوكس ان استراليا وكوريا الجنوبية واليابان هربوا من مواجهة المنتخب السعودي في نهائيات اسيا 2015؟
راشد الدوسري- الخبر
- ذكرتني بتصريح الجوهر يومه يقول حظ الالمان رمتهم القرعة مع (الاخضر) وآخرتها اندبغنا ثمانية!
* الاستاذ ابو العواكيس هل صحيح ان الادارة ستضع سامي كبش فداء عشان تستمر فترة اطول في الكرسي؟
فهد الرشيد- الرياض
- الجميع كبش فداء حتى الجماهير المغلوبة على امرها ..أهم شيء يستمرون!
* تحياتي يامعوكس لك ولأسرتك وأهل دريتك وياليت تفيدنا عن مصير خصخصة الاندية وهل هناك (أمل) لاعتمادها؟
خالد البدر- تبوك
- لا أمل ولا نوال.. الموضوع ومافيه ضحك على الذقون ودغدغة لمشاعر الجماهير بالاحلام وردد يا ليل ما اطولك!
* الحبيب معوكس ياكثر مايهدد ويتوعد بعض رؤساء واعضاء اللجان بعض الاندية واللاعبين والاداريين.. ويصمتون امام بعضها.. برأيك ليش؟
صالح التميمي- الرياض
كل اللجان اللي حلت والاعضاء اللي انفصلوا وتقول ليش.. عموما من خاف سلم وخل الناس تعيش؟
* هل صحيح ياستاذ معوكس ان بلاتر معجب بالدوري السعودي وانه ما ينام (حسب فارق التوقيت) عشان يشوف المباريات عندنا؟
يوسف عوض- عسير
- يمكن اعجبه (الدفع الرباعي) وناوي يطبقه في المونديال!
* الى ترجمان الامة الرياضية ابو العواكيس وش ناقصك عشان تصير رئيس او عضو لجنة او سكرتير؟
محمد الخالدي- الرياض
- ناقصني قريب يدزني عبر اتصال وأوعدك باقتحام أهم وأخطر لجنة!
* الاستاذ معوكس نقول لادارة الهلال شكرا على التجديد مع الدوسري وعقبال التجديد مع بقية النجوم؟
محمد الخمشي- عرعر
- ماقصروا نفضوا كل الميزانية.. وبالنهاية لقيتك ياعبدالمعين تنعان!
* البروفسور معوكس افدنا عن تجاوزات بعض اللاعبين .. ليش تصمت اللجان امامها ومايقولون شيء .. خوف والا تعاطف والا عدم اهتمام بتطبيق القانون؟
سعد الشهراني- خميس مشيط
- جميع ماذكرت يأخ سعد وأهم شيء يفرح (حبيب القلب)!
* الاخ العزيز معوكس صحيح انك في كل مجلس تنفي ميولك.. خلك شجاع وقل الحقيقة ولا تخاف؟
عبدالعزيز القحطاني- ابها
- انا ما اخاف والدليل اني ادعم فريقي من يوم كنت صغيّر قدام الناس ووسائل الاعلام!
* لاهنت ياصديق الجميع ابو العواكيس.. كيف قرأت بيان امين صندوق نادي الاتحاد.. وهل لامس الحقائق وكشف المستور؟
- ماهو بس لامس الا كشف (بلاوي).. وحنا بالمدرج نتفرج!
* الى عنتر زمانه معوكس كيف تشاهد مستوى الهلال.. وهل تعتقد انه سيتعدى الى الدور الثاني في دوري ابطال اسيا؟
المشجع المصداوي فهد عبدالله- الدوادمي
- بهالمستوى اللي يرقل مارايح يتعدى فريقك!
* دكتور الاعلام الرياضي معوكس وش اسوأ شيء في مدرب المنتخب لوبيز حتى يفكرون بتغييره؟
المنتخباوي- محمد العمر- الرياض
- نسيت يومه يقول العنزي الحارس الرابع!
* ما تتفق معي يابو العواكيس ان بعض اللاعبين عقليته صغيرة وانه يطير مع العجة اذا مدحه الاعلام؟
عبدالحميد الحربي- جدة
- وين تبي لبعض اللاعبين الا شف عقليات الاداريين وتغسل يدك؟
* اخي معوكس وين تهديدات بعض الحكام بالاعتزال اذا استقال عمر المهنا.. والا مناورات تكتيكية؟
عبدالله الزهراني- الباحة
- اتحدى واحد يعتزل.. يارجال لو قالوا لهم روحوا رجعوا، مثل هياط بعض الشعراء!
* حبيب الكل معوكس صحيح بلاتر متأثر بما يطرحه لدينا بعض الكتاب، وانه يقول طبقوه في الاتحاد الدولي؟
سعد الناصر- الدمام
- يقولون يموت بالاقلام الكحلية.. ويقول تكفون خلوني اكحل عيوني بشوفهم.
* لك التحية والتقدير يامعوكس .. ما عاد شفنا عواجي بعد لقاء النصر والشباب يحكم مباريات كبيرة؟
سعود الروقي- الطائف
- جاب كل ماعنده في ذيك المباراة وهذا هو المهم!