من جور وقتك ماتغير مباديك

ياطويق لو كثرت عليك الاعاصير
تبقى مكانك شامخات(ن) عواليك
ماهزتك ريح الهبايب بتغيير
ثابت وراسي ماتزحزح رواسيك
هذا انت ياقلب(ن) بك السر فبير
ومن جور وقتك ماتغير مباديك
تكتم همومك داخل الصدر وتسير
ولا أحد(ن) نشدك تقول ما شي مشقيك
تصبر على مر الزمن والمقادير
لو زادت جروحك وشي(ن) معنيك
وتعيش وقتك راجي(ن) للتباشير
واحلام عمرك ماتهدم مبانيك
خليت همك فيك ماتشكي الغير
من قو صبرك ماتبين خوافيك
لو هو ثقيل ومشغلك بالتفاكير
تخفيه لو ضاقت عليك المساليك
ألا على رب(ن) يدبرك تدبير
اللي ليا ضاقت دعيته ويكفيك
ويزيل عنك الهم من دون تأخير
مابين كاف ونون ربك ينجيك
نواف بن محمد الصخابرة