صوت الصورة

اللي قعد فوق الحطب شب ناره
والظاهر إن البرد يا ناس حاديه
مدري بوسط البر .. وإلا بداره
عند الجمر بردان ويصخّن إيديه
مفرّطٍ .. والنار تبدأ بشراره
وإن شب ثوبه حرق ماعاد يمديه
محمد إبراهيم الفهيد – الزلفي
النّار لا تاكل الرجلين
مع شدّة البرد راكبها
اللي يشوفه يقول أذهين
الله يستر عوابقها
عبدالكريم عبدالرحمن السلوم - القرائن
البرد جانا من وراء جبال عمان
والثلج غطى المملكه من شمالي
وخوينا ركب على الجذع بردان
ويدينه يقلبهن على حر صالي
محدٍ يلومه حيث بردان .. بحلان
ما تفيد دفايه .. وثيابٍ ثقالي
خالد ناصر المخيمر – روضة سدير
يا صاحبي جلستك فيها الفكر حار
ما كل من يجلس تسوي سواته
خذر الحذر لا تلهمك شبّة النّار
ما هي معارك أحدٍ تحلّص عراكه
عبدالرحمن أحمد الكنهل - الرياض
للبرد وش ودَّاك والثلج يا حصان
تبْي الدفا إزبن دار نجد العذيّه
بالحر خلّك بين رفحا أو صديان
وبالبرد إسْرح في طوارف طميّه
فهد بن عقيل الطويان - بريدة
الشلوطة آخر فنون الحلاقه
أسرع وأسهل من مكاين وأمواس
وان كان مالك باللواهيب طاقه
البرد مثل البنج ويعطّل إحساس
يالله بسترك تستر من الطفاقه
ياما جنت على أهلها عقب الاوناس
عادل عبدالعزيز الصالح
قربت يا صاحبي والنار مشعومه
وأخشى ينوشك سناها يا كل ثيابك
يا عل نارك تطرد البرد وهمومه
وكبر الحطب يا عميلي يغري أصحابك
ينقصك دله مع البراد وعلومه
وعلوم خيرٍ عساها تطرب أحبابك
حمد عبدالله الوايلي - حوطة سدير
البرد خيّم .. والدفا ينتدوّر
والروح عجزت من سواياه ترتاح
من شافها جلستك قال يتجوّر
كنّه على طلب الدفا صار سوّاح
فيصل سليمان المجلي
ما حده إلا البرد والبرد ما صار
يبي الدفاء معذور والنار تصلاه
بعض المناطق بردها صاير أصفار
مير الحذر مطلوب يا ناس مبداه
خليف الحربي - الرياض
على العقيرة قعد والضو مشبوبه
من شدّة البرد ما يدري عواقبها
قاعد يصوّر عسى ما تعلق بثوبه
ثواني لصورة الجوال حاسبها
متلطمٍ عن صقيع البرد ودروبه
وإذاعة الطقس دايم عند جانبها
سعود بن عبدالعزيز الهزاع - نعام
هبت شمال وجانا البرد
غلي الحطب عند جلابه
وابو سعد ولع المنقد
السمر جابه من أصحابه
ريح السمر مثل ريح الند
جذع السمر صار مرقابه
عبد العزيز الصالح - القصب
صورة العدد
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بمشاركاتكم الشعرية وما تلتقطه
عدساتكم من الصور الهادفة والطريفة..
ويا هلا ومرحبا..