سهيل بان

اسهيل بان وجاك وقت البرادي
والصيف راح وصار بالجو تغيير
نبغى على متن الجيوب الجدادي
قطع الفيافي في بعيد المشاوير
مع خوة ارجالن لهم بالفؤادي
حشمة وقيمة واحترامن وتقدير
ما هيب خوة كاسبين الدوادي
اللي بعرض الناس مثل المناشير
اهل الردى ما من وراهم سدادي
ولا عليهم يسند العلم ويسير
واهل الوفاء هم غايتي والمرادي
معهم نسج الرجل في صبح وعصير
وسوالفن ما مثلها بالوكادي
يطرب لها الخافق ويسلا عن الغير
والنار موقدها عليها ينادي
من طيب راسة صدر العلم تصدير
وسط الفياض اللي لها الشوق زادي
مع النشاما والدلال المباهير
رحلة غلاها عندنا غير عادي
مع سجتن تسوى الذهب والدنانير
نواف بن محمد الصخابرة