صوت الصورة

هذا العسل صافي ولاهوب مغشوش
ما ينقطع مهما مصبه رفعناه
رحيق زهر أشجار محدٍ له اينوش
بعالي جبل من فوق وادي جلبناه
خذ ملعقه مع فكّة الريق واتحوش
العافيه ذا قول مثبت سمعناه
فهد بن عقيل الطويان
أنظر عسل سدرٍ من النحل صافي
لاتحسبه مخلوط وفيه الشوايب
خالص بلاغشٍ وراعيه وافي
يعرضه أمام الناس ماهوب هايب
ترى المعسل نعمه للأمراض شافي
أفضل هديه للأهل والقرايب
عبدالله الحامد الشريف
وجهٍ لبياعٍ تجلى به الخير
يعرض عسل نحلٍ بسوقٍ بيمناه
ألوان وأنواعٍ من أحلى الأزاهير
ياما حلا إن كان من أصل مجناه
وشاريه في حاجه لخبره وتفكير
ويا بخت من ربه ليا باع يخشاه
سعود عائش الحربي
يا زين شوف العسل والزين في لونه
لون الذهب يوم يصهر على ناره
أشقر طبيعي ولا يمكن يغشونه
فوايده باينه بالشكل والشاره
حمد عبدالله الوايلي
العسل نعمة من إله المخاليق
مذكور بالقرآن والناس دارين
ياما حلا أخذه ولعقه على الريق
تغنيك عن بعض السلع بالدكاكين
شهر العسل محبوب بين العشاشيق
مضرب مثل للي عن الهم سالين
خالد ناصر المخيمر
صُب العسل واكرم ضيوفك ترى خير
الله رزقنا للدوا بطن نحله
سبحان ربي سر في بطن هالطير
شفا للمؤمن وربعه وأهله
عبدالعزيز مقبل البشاري
كم مرةٍ خذنا عسل وصار مغشوش
الا أنت يالمطوع عسلكم طبيعي
ماهي خسارة لو دفعنا لك قروش
أهم شي إنه سدر أو ربيعي
سعود عبدالعزيز الهزاع
هذا العسل فيه الفوائد والأطباب
طبٍ لمن صابه من السقم تأثير
ويعطى هديه للقرايب والأصحاب
يستاهله كل أجودي دون تأخير
بشائر القحطاني
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساكم من الصور
الطريفة والهادفة .. وياهلا
صورة العدد السابق
،