يطول ليلي والسهر يرسم اشجون

ما أنتي طبيعية ولا حبي جنون
وماأنتي خيالية ولاني مكابر
أنساك مرّه لكن أذكرك مليون
ومليون مرّة يحترق قلب صابر
أحس في قلبي من أسبابك طعون
وأشوف ماأنتي مثل ماكنت خابر
وعلى امل انسى أردد على هون
قبل أمس شيّعت الغلا للمقابر
ولأشرق جبينك ساطع ٍ يضوي الكون
أرجع لحبك وأجتهد به وأثابر
أنتي حقيقة مابها شك وظنون
ماأنتي حلم في ليلة الحب عابر
تجين شوق وكل ما اجيك مفتون
ياحي وقفات الحرار الأكابر
مابك خيانة بس أنا مدري اشلون
قلبك جمع جهل الهوى والمخابر
يطول ليلي والسهر يرسم اشجون
وتبدأ معاناة الورق والمحابر
أنا أضمنك وأنا بي الحب مضمون
وكل شيء ولا كسراً يجي دون جابر
عشقيٍ رسم في نظرة عيونك فنون
وصدق الغلا كوّن بقلبك منابر
بس الحقيقة شفت مالا يشوفون
ماأنتي على ماكنت يا بنت خابر
محمد حلوان الشراري