أشهد ان المفارق للحبايب يلوعي

يوم وادعني المجمول هلّت دموعي
مثل وبل السحاب اللي تلامع بروقه
سافر الترف لبلاده نهار الربوعي
الله يرجع الغالي لدار معشوقه
أشهد ان المفارق للحبايب يلوعي
من تولع بحب البيض لازم يعوقه
كيف اطيق العزا لاغبت عني اسبوعي
ارحم المغرم اللي لجلكم زاد شوقه
والله اني خطير عقب زين الطبوعي
من فراقه ترى الخفاق يبست عروقه
جاهل تل قلبي بين حدب الضلوعي
بالموده من أقصى الجوف شال معلوقه
العذارى إلى أقبل وقفن له خضوعي
مالك الجمال وفاز في حسن ذوقه
خدها فيه زهر الورد من كل نوعي
لافهق عن شعاع الصبح ساعة شروقه
ماخذ النحل من شهد ثغره شموعي
في شفاها شفا للعاشق اللي يذوقه
عين حر على جول الحباري بتوعي
لاشهر بالفضاء قامت تلاعب سبوقه
عنق ريمية قفت تقود الجموعي
سمعت اللي مع الخبه ذعرها نشوقه
زمة النهد في صدره بدت بالطلوعي
ناعم يشكي الفستان لا صار فوقه
عود موز تمايل وسط خضر الزروعي
كل ماهب نسناس الهوى في عذوقه
محمد فهد الجربوع العنزي