ياكم هقينا مالقينا محاصيل

العمر رحلة والليالي مقابيل
والوقت ماشي بين نازل ورحال
ياكم هقينا ما لقينا محاصيل
وياكم نصانا الحظ من دون نحتال
نقول لا ضاقت علينا تساهيل
ونشكي على الله ضيقة الصدر والبال
نرفض هوان النفس جملة وتفصيل
ونكابد البلوة ولو دربها طال
ما نرتخي ونبدل القصد ونميل
والله خبير وعالم بكل الأحوال
نشوف من بعض المشاكل غرابيل
نكتم ويقراها من الناس رجال
ومن لا يفز إن جيت ويحط ويشيل
ولا يسوق الجاه والنفس والمال
ماله قدر لو يعتزي بالاقاويل
والرجل يعرف بالمواقف والافعال