عمر الفتى لوطال بتغمض العين

دنياك ثارت في حمايم براكين
لوضحكت يالقرم ترجع خلافي
دنيا ً غريبه ماصفت للنبين
وعن مكرها بحذرك لازمن تخافي
الناس فيها غافلين(ن) مساكين
يسلون فرحه يحسبونه عوافي
كم شتت من رووس قوم(ن) عزيزين
غابوا وباقي ذكرهم غير خافي
وعمر الفتى لوطال بتغمض العين
يظلم عليه الكون تحت السوافي
باقي شعر شعّار رمز وعناوين
ترجّع الماضي بذيك القوافي
وين القصايد وين ذيك الدواوين
قبل السديري مات صقر النصافي
ذكر الرجل ياخلق شيّن من اثنين
بالطيب والمعروف رجّال وافي
إلى نخيته من هل العرف واللين
حاضر على الفزعات دايم يشافي
وفيها رخوم(ن) باللوازم وضيعين
ياليتها بالكون تلبس غدافي
والا خسيس وينحسب بالرديين
أسود نوايا يالله إنك تعافي
عبدالكريم إبراهيم بن خزيّم