لو ارتحل نايف عن العين ماغاب

يا الله يا منزل تبارك والأحزاب
أحسن عزانا في عظيم الرزيه
وافرغ علينا الصبر في فقد الأحباب
اللي خذتهم غصب عنا المنيه
وانبت على قبرٍ وضع بأطهر تراب
زاهي الزهور اليانعات النديه
واغفر لنايف عد ما قري في كتاب
واجعل مقره في الجنان العليه
نايف ومن مثله؟! له المجد وثاب
تبطي النسا ما جابن اليوم زيه
من شجرة آل سعود زاكين الأنساب
الغانمين أهل الصفات الشليه
الصارم الحازم قطع روس الارهاب
رجل الأمن حامي حمى الداخليه
حارب هل التكفير واللي له أذناب
اللي تريد ارجاعنا جاهليه
وابدى الصفح عن مخطي(ن) بعد ما تاب
دله إلى دروب الهدى بعد غيه
واهل الخراب مروجة سم الأعصاب
دمر منابعهم بيد قويه
ارسى نظام حاز تقدير واعجاب
كل العرب حتى الدول الأجنبيه
طبق شريعة خالقه رب الأرباب
في العدل كل الناس عنده سويه
كم ليلة يسهر له النوم ما طاب
من أجل ننعم بالحياة الهنيه
مع شدته في الحق مارد طلاب
بذل العطا والجود عنده سجيه
ما غرته دنيا ولا زخرف القاب
نهجه كتاب الله وسنة نبيه
لو ارتحل نايف عن العين ما غاب
تبقى فعوله شامخات جليه
جانا خبر نعيه كما قرصة الداب
اظلم سمانا والشمس فيه حيه
كل الشعب في نايف العز منصاب
وقع الخبر في قلوبنا صار كيه
ندعي له الرحمن والدمع سكاب
في رحمة الله على نفسه رضيه
منا لنايف كل ما هب هباب
اجمل سلام مع رقيق التحيه
نرفع تعازي المملكه حضر واعراب
للعاهل الغالي حبيب الرعيه
واختامها ما ريد تطويل واسهاب
حنا لقادتنا جنود وفيه
ناصر بن جمعان آل عوض