صوت الصورة

الموتر إلي نوى الاقلاع
شوي ويصير طياره
خابره يمشي بوسط القاع
واليوم متعلي الحاره
راعيه لا من نوى المفزاع
بيدوس ويجود الطاره
شبيب حمود القحطاني - المزاحمية
تبردي يا موتري عن لظا الشمس
موقفك بالعالي ولا أحد ينافسك
إذا بغيتك فيه ريموت باللمس
اضغط على زره وايدي تلامسك
أبعد عن الددسن مع الفرت والجمس
لا تختلط بالقير واللي يدانسك
عبدالكريم النقيمشي - الربيعية
يا راعي الموتور المرفوع
على الملاحق تمشونه
موقف موقف ممنوع
بالله وش لون ترقونه
أظن في موقفه مصنوع
ما شفت ونش يشيلونه
حمود شبيب آل غيث
الموتر اللي فوق سطحه تربع
يمكن هله يا ناس خلوه تذكار
ما هو جديد أكيد أصبح قرنبع
ودوه للمتحف يشوفونه زوار
راعيه للموديلات قام يتتبع
عينه على السوبر ولا التاون كار
خالد بن ناصر المخيمر
يالموتر الغالي بعد كل مشوار
من الخوف من السرقة على السطح معليه
الله يستر لا يجي ريح وامطار
فيسلم الموتر على راس راعيه
ترى الحماقة ممكن تهدم الدار
وتهلك ذكياً بارعاً ساكناً فيه
عبدالرحمن آل موسى - الرياض
العرض لا يفوتك ترى الوقت محدود
والحجز مجاني على اللي تريدون
هبوطنا بجدار ولا على حيود
تسعين بالميه بموته يعزون
عواض صنيتان الوسمي
يا صاحب الفكره وش حدك على البيت
تسعين بالميه مهدد حياتك
عبر الخزامى ادعيك يا شايع الصيت
أرجوك لا تشوه المنظر ابلادك
عبيد فنيس الوهيبي - النعيرية
دنياك ما دامت الغيرك عوافي
اصبر على الشطه وكثر الغرابيل
لا تتركه تسفى عليه السوافي
حوله لا تكثر عليك الأقاويل
احد على جديد والبعض حافي
الصبر درب ل الرجال المشاكيل
خالد غنام آل حويل
يا موتري ما انت رخيص عليّه
حيثى احبك قلت انا محسنك فوق
حيث المفحط بين روحه وجيّه
قلت ارفعك عن كل جاهل ومطفوق
والآدمي لا سار شاف الأذيّه
شاف الخطر ما بين لاحق وملحوق
محمد بن عبدالعزيز الخنيفر
امس والله شفت لي صوره غريبه
شفت موتر واقف على السطوحي
انشد اللي موتره صعب يجيبه
كيف يبغى يركب ويبغى يروحي
أشهد إني شفت لي صوره عجيبه
وفالخزامى طالعة والكل يوحي
سعود بن سعد الحافي - الرياض
من قال بيت الطين اهون من العُودْ
يكفيه شوف السطح ياقو داره
واليوم من حمده من الصلب عامود
عُمرت به دور بريف وحاره
وهذا الأمن في ديرة الأمن موجود
بيت وسياره وَلا به خَفَاره
سعود عائش التميمي الحربي - جدة
طار الحديد وصار في السوق غالي
واللي بيبني دور ثاني ما يقدرش
بس فيه فكره ما لها اول وتالي
من وين جات وكيف والله ما بعرفش
يبني بعربية وملهم ومالي
اعمل كذا في الغيط ديما ولا يخفش
فارس الثبيتي - الرياض
رفعت مقداري عسى الله يخليك
وحطيتني من فوق بيتك علامه
لشفت زولك من بعيد اعتزي فيك
واقول يا ربي تعلي مقامه
يتحمل فيني وأنا أحب طاريك
والله ختمها بيننا بالسلامه
هاني عقلا الخزن - تبوك
أبا أنتحر مليت مليت مليت
من كثر ما جارت عليا المسافات
رميتني بالسطح في عالي البيت
احرقتني بالشمس عقب المكسافات
شوهت منظر ديرتك بي وشريت
بالفه اللي بانيه يا حسافات
أمل محمد - مكة
احتار راع المويتروش يسويبه
ما عاد له في بعيد الدار هقواتي
اقفا مديله وكثرن به عذاريبه
خلاه يوقف على عال الطويلاتي
صلب عموده ولا يفيد توضيبه
عوضوه في موتره واخذو دعاياتي
غنام مسعود القريني
من عقب ماني عظيمة شان
ودايم بعينك تراعيني
اليوم حطيتني خزان
بمسطح البيت راميني
نسيت فعولي مع البران
ومع كل درباً توديني
عقلا خزن العنزي - تبوك
يا ناس شي يخلي العقل محتار
شي يخلي ذهين العقل مربوش
ما خبر به موتر شكله كما صار
يا كيف سيارة تجعل على الحوش
مدري محبه أو انه سر ما اسرار
مشراه غالي ولا جاكون بقروش
مبارك بن طرجم
الموتر اللي واضعينه على السطح
تلعبه الأرياح شرق وشمالي
ليه المصور صوره ما نطحه نطح
ودقق بتصويره وجاله مجالي
مطر شباط مطر القهيقي - تيماء
سيارة فوق سطح البيت
لها خمس سنين مرميه
اشوفها كل ما مريت
جهة عفيف الشمالية
محمد عفار المطيري - عنيزة