الله يعوض مصاب الأمه ويجبره

للموت وقفة ذهول وللوداع احترام
للحق لحظة وصول وللرضى مفخره
للسيف غمدٍ يظمّه بعد طول القيام
وللأسم ذكرٍ سنين العمر ماتنكره
وللعمر حدٍ رهيف وللزمام استلام
وللفعل صوتٍ يدوّي والدهر يذكره
يانايف ابن العظيم اللي فتحها سلام
ما للقصايد ولو زاد الوجع معذره
اختارك الله بعد سلطان في ظرف عام
عزي لابو متعب وعزّي بعَد لظْهره
وعزي لشعبٍ عيونه قبل موتك صيام
عن دمعها اللي بموتك للأسى تنثره
ماخنت عرقٍ ورثته عن إمام وإمام
لا والله الا منحته من وفاك اثمره
واليوم وجه الحقيقه في عيون الختام
من مسك سيرة نضالك سيّدي عطّره
الامن يسأل بلادك وين راح الحسام
واحساس صوت الملايك جاوبه..مغفره
واهل اللحا عبّروا لك في شموخ الكلام
من حسرة الفقد.. جرح الدين يامكبره
في كل بيتٍ حفظته لك وداعٍ يقام
حتى خلط دمع عين الرجل دمع المره
يامخرجٍ جيل شعبك من كهوف الظلام
اللي بنتها يدين الحقد والشوشره
للنور في هدي ابوالقاسم ونهج الكرام
ولا لعدل الشريعه في طرف مقبره
ماعرْف موطن جدودك في عهَدك انقسام
وشلون وانت بجفون حمايتك تسهره
يارب كيف الوسيله دام مابه دوام
الا لوجهك وحكمك مانرد اخبره
مانملك الا الصمود وللعهود التزام
وسيفٍ صقلْه بيمينه للعدو نشهره
الصبر سنة رجالٍ قبلنا ماتظام
من وكل امره لربّه لو عظُم صبّره
لا راح سيّد..مكانه سيدٍ كفو قام
وحنا مع الشيخ والله ميمنه..ميسره
غمض عيونك وودّع هالزمن في سلام
والله يعوض مصاب الامه ويجبره
ياسيّدي قبل تنزل عن فرسك وتنام
أمدد كفاحك نقبل جوده ونشكره
احمد سارح