لعل قبره روضةٍ كلها نور

قصيدة رثاء في صاحب السمو الملكي الأمير سلطان بن عبدالعزيز آل سعود رحمه الله وأسكنه فسيح جناته..
ياليت والله ما سمعنا بما صار
العلم شين والمحطة تذيعه
صباح يوم السبت يا شين الاخبار
يوم الوطن حلت عليه الفجيعه
شي يخلي وافي العقل يحتار
لو حاول اعصابه تعيي تطيعه
يا أمير لو هي حرب في وقت الاخطار
تشوف شعب ما يحب الهزيعه
يفداك في دمعه ويرخص لك اعمار
عندك خبر هذا لشعبك طبيعه
لكنها يا سيدي حكم واقدار
قدرة ولي العرش حكم وشريعه
وشلون نحصي سيرة تملى الاقطار
ريف الضعوف ولا يحب القطيعه
الراي عنده كان كثرن الاشوار
بالفعل والحكمة عدو الخديعه
وعلى المعادي سيدي سيف بتار
مواقفه وقت الشدايد فضيعه
رجواي يالمعبود علام الاسرار
يرحم سهيل اللي فقدنا لميعه
لعل قبره روضة كلها أنوار
ومنزاله الفردوس بأعلى الوسيعه
واليا دعا الداعي وزاغن الابصار
عسى رسول الله محمد شفيعه
العميد ركن عبدالعزيز بن عبدالكريم الباهلي