رسمته أجمل صورة في خيالي

دامه سلا عني فانا عنه سالي
لا يوجع الخافق ولا اوجع ضميره
يروح في فاله وانا صوب فالي
لو هو جرحني بالظروف الأخيره
يوم الإجابة منه تكسح سؤالي
الله يغفر له ويحسن مصيره
يبقى على ما قيل طيب وغالي
واذا لقا غيري انا عفت غيره
حقه علي إن حل ذكره فبالي
ادعي له الله واذكره عند خيره
واذا تجاهلني إلى جا مجالي
أثني عليه إن جاله بيوم سيره
وكانه يدور بالخلايق بدالي
الله من أشرار الخلايق يجيره
رسمته أجمل صورة في خيالي
لو كان يرسمني بصورة مريره
مديت له من كل وجهة حبالي
ومهما تطول بعين كفه قصيره
قلت اتركه واروح وابقى لحالي
لو هي كبيرة بعتبرها صغيره
ويبقى على ما قيل طيب وغالي
والله يغفر له ويحسن مصيره
فيصل بن سبيّل