الصمت وجراحه

يضيق الكون من سبة غيابك والوجيه اشباح
عجزت القى عن اشباح الطريق وضيقتي ساحه
انا يوم اتبع دروبك احسب اني معاك ارتاح
دخيلك وين اروح ان مالقيت بسكتك راحه
على شانك وفيت ولا جنيت الا الم واجراح
عبث تنكر وفا قلب يحن وحزنه اجتاحه
انا من يبست اطرافي عرفت ان الظما ذباح
تعال اعتق جريح يندهك عن وجه ذباحه
تعبت ابكي على عمر تحايله السنين وراح
واقول الله يسامح كل حلم شح بافراحه
اكابر وانكر الذكرى وعلى طيفك احن لا لاح
واضيع بغربتي بينك وبين الصمت واجراحه
اجي مثل الضرير اللي يقول ان الأمل مصباح
ولكن القدر ضيع مداه وخان مصباحه
ترى لا شح معروف الصبر ما للفرج مفتاح
مصيبه لو يخون المنتظر صبره ومفتاحه
تبي تعرف متى تندم على كبر الغلا يا صاح
ليا من طاح من عينك عزيز صعب مطياحه
عبدالمجيد العنزي