مواليف المجالس

رساله وعن مضمونها يدري ذهين
ومقصودها جيل ٍعلى آخر دروبه
على الهون يا طاوي من القرن ربعين
نشوف العجب في قرن صرتوا عيوبه
وراكم على شذب القفا مستعدين
ليا غاب غايبكم تشب الشبوبه
نقول العرب يوم التجماع صافين
وصارت مواليف المجالس كذوبه
مشينا بوجه ويملك النذل وجهين
ولو جاك بلسانه جمال وعذوبه
تربع يشيل النفس شف هامته وين
والآخر زعيم ورفعة الشان دوبه
تراهم ليا جات الشدايد مقفين
وباليسر شمر قاصر الباع ثوبه
يصيب الوهن يوم الشدايد هل اللين
وهن ناقة الجالب نهار الجلوبه
عرفنا الوجيه العابسه والرديين
عزاك الطريق اللي هزع درهموبه
مشينا على وضح النقا شوفة العين
على الطيب والمعروف ما عاملوبه
ولا هي تعم الطيبين الميامين
هل الطيب وان ضاق الزمان محسوبه
صحيح انهم بالوقت هذا قليلين
زمانك تغير والكديش اكثروبه
نادر بن طريخم