لو تكرم بس تطلق لي السراح

يا بقايا القلب وين القلب راح
ذاب مع قسوة عذابه والسنين
وش تبي بالحب إذا كله جراح
ما كفاك ألآم وآهات الأنين
واهني اللي من الحب استراح
ما شكى مثلي عذاب العاشقين
ولا سهر مثلي إلى نور الصباح
ولا شكى من دمعةٍ حارة بعين
وما جفاه النوم في وقت المراح
غفوته تاتي لعينه كل حين
صرت أنا والورق رفقه بالنياح
نوحته سالي وأنا نوحي حزين
أو كما طيرٍ مصوب بالجناح
لو بغى الطيره تعوقه ريشتين
بي طعونٍ كنها طعنة رماح
ما اصعب الطعنه على القلب الشطين
آه من همٍ لفكري إستباح
ما قدرت أسلاه من زود الحنين
ما تسليني القصايد والمزاح
لوضحك وجهي أنا فرحي ضنين
آه من حظٍ إلا من قام طاح
ما لقا في عثرته منهو يعين
لو تكرم بس تطلق لي السراح
انتهت حالي وأنا بحبك سجين
ياظنيني لا تحسب السد باح.
حالف يبقى بعد سرك دفين
بس أنا اشكي من الهوى قدر المتاح
واحذر بشكواي اسمك لا يبين
يا بقايا القلب قولي وبالصراح
ما مضى من حب تنسيه السنين
عبدالمحسن بن محمد الجريسي