الله يا رمضان

الله يا شهر رمضان اللي نزل فيه الكتاب
على النبي الهاشمي محمد ابن المطلب
صل الله وسلم على خير البشر سمح الجناب
شفيعنا في يوم ما ينفع به أموال وذهب
فالشهر هذا ليلةٍ تنجي العباد من العذاب
ينزل بها الرحمن ويقول إن دعيتوني أجب
يا رب رحمتك وثوابك، أنت من تجزي الثواب
وبعزتك لا من ذكرتك راحت دموعي تصب
أبكي وأنا أدري بأنني لا مت قدامي حساب
وخابر ذنوبي تمتلي منها الصحايف والكتب
شاعر وعشت العمر طايش بين ما لذَ وطاب
واقول شيءٍ ما فعلته وابتكر وأكره وأحب
أغواني ابليس وعمى عيني عن دروب الصواب
تبت يدينه مثل ما تبت يدين أبو لهب
خيّل لي أحلام وأماني لجلها سقت الركاب
وصدمت في واقع مرير وعالمٍ ما فيه طب
راحت أمانيي وأحلامي هبابٍ في هباب
أبغى الغنايم وإثرني ما قد جنيت إلا التعب
يا رب أبي عفوك ومغفرتك وعتق من العقاب
يا مجريٍ هوج الرياح ومنشيٍ غر السحب
يدعيك عبدٍ من ذنوبه بين ناب وبين ناب
خايف على روحه ليا كُفّن وخلوه العرب
فالوقت هذا ما يفكّه لا قصيد ولا زهاب
ولا حبيب ولا قريب ولا فلوس ولا نسب
فزعتك ياللي خالقٍ آدم وحوى من تراب
أنذل لك، وأرفع يديني خاضعٍ لك محتسب
ياليت كل اللي جنيته بالعمر يصبح خراب
واكسب رضاتك يا مجيب العبد لا منه طلب
فهد الصعيري