صرح النجاح

إمسك خيوط الحلم بأقوى يدينك
لا تشدها طمعه، ولا تفكها ياس
وصافح بقلبك قبل مدّة يمينك
لا تحصر شعور المحبة بمقياس
وبرِّد على قلبك من دموع عينك
خل البراد إلك أنت، والصيف للناس
وإن كان صدرك ما يخفّي ونينك
إمنع سفر همّك على متن الأنفاس
وقدّم لوقتك ما ينوّر جبينك
لا أظلم عليك الوقت وتصير نبراس
الوقت ما يعرف نسب والدينك
كم شجرةٍ ما يعرف جذورها الفاس
يمكن سعة صدرك بلحظة تدينك
ويمكن طهر قلبك يصخرك لأنجاس
لا صرت واقف بالرضا خادمينك
وإن طحت قفّوا عنك حتى بالاحساس
واصل طريقك واترك لحاسدينك
صرح النجاح اللي بنيته على ساس
لو كنت فاشل ما دروا عنك وينك
محدٍ يعامل بنك في حالة إفلاس
وشلون فقر المال كدّر سنينك
وعندك خبر بأن الفحم أصل الألماس؟
وان النبي اللي بعث لك بدينك
ينام وعروقه من الجوع يباس
فقرك قِدر لا يمكن إنه يهينك
اللي يهينك حني راسك تحت راس