وجهة دعاء

وجهك دعاء.. و دفتري يصرخ آمين
وشلون أشوّه كل طهرك بحبري
انتي البياض اللي كتبني من سنين
أخفيه.. لا يظهر ويكفر بشعري
تجين شفافة ولا تلمحك عين
و اتنفسك وأحبس عفافك بصدري
و تقفين سحر يفلق البحر نصفين
واللي تفرعن قد غرق فيك بدري
وأنا حقيقة ضايعة بين قوسين
قلبٍ حبسني بين أدري وما أدري
إن شلت همك.. مارجحت بي موازين
من كبر قدرك.. أذهل القلب صغري
غصب يتحجم كل من يجعلك بين
عمر الوسط ما كان بك يوم يسري
من وين.. عيا لا يودي على وين
دام الجهات الأربعة وهم عمري