بيت وصدى

الأسبوع الماضي كان بيت الأسبوع من طرح الشاعر حمد عبدالله الوايلي من حوطة سدير والذي يقول:
بسم الولي نبدا مع بداية العام
ومن يجتهد هالحين يلقى حصيله
وقد كان الصدى من الشعراء:
الله يعز الدين ويعز الاسلام
ويحما الوطن من كل شر ورذيله
لو تتعب الأقدام والعين قدام
بالعلم نرقى المجد بأفضل وسيله
وصبر على طول الليالي والأيام
أما يجينا الخير وإلا نجيله
جسار مهدي السبيعي، الرياض
الوقت ضيق باقى أشهور وأيام
الله يوفق كل من شد حيله
ياللي بذلت الجهد حققت الاحلام
ان ما قتلت الوقت تصبح قتيله
من يفقد الاحساس لا نام ما قام
ما همه الا النوم باية وسيله
مبارك بن محمد أبو عجاري، المضة
كل حسب مبداه شيبان وغلام
والناجح الكسبان من شد حيله
يا طالبين العلم في مهد الإسلام
من جد بعد الله نال الفضيله
نيل المعالي ما تجي وهم واحلام
لا حد من الأجناس يرضى الفشيله
علي آل زولان، فيفا
الرابح اللي يسهر الليل ما نام
والخاسر اللي نام صبحه وليله
العلم نور وحثنا دين الإسلام
على الطلب له والتعب في سبيله
عند الشدايد راعي العلم لا قام
ينهي برايه كل مشكل يجيله
فهد بن عقيل الطويان، بريدة
بيت الأسبوع
كتبه الشاعر خالد إبراهيم المرشود من الرياض حول مقترح الأخ فهد عبدالرزاق الشمري لموضوع من يؤدون الحج كل عام ومحاولة إعطاء الفرصة للغير ويقول:
يا ناس ياللي كل عام تحجون
لا تضايقون الناس والحج مره
نستقبل صدى البيت بثلاثة أبيات تناقش هذه القضية بموضوعية وذلك على الفاكس (4871070) أو الايميل kb-khozama@alriyadh.com
مقترح لبيت الأسبوع القادم
بعث للصفحة الأخ حمود بن سعد الضويحي من الرياض هذا الاقتراح لموضوع بيت الأسبوع القادم وهو مشكلة المباني المستأجرة للمدارس ومحاولة الخلاص منها.