مرحوم من حط المراجل رصيده

مرثية في الشيخ صالح بن فهد بن زعير (محافظ الحريق سابقاً) رحمه الله وأسكنه فسيح جناته
عزّاه يااللي تالي السبت مدفون
فقيدة يا كبرها من فقيده
سلمان صار من أول اللي يعزون
مرحوم من حط المراجل رصيده
من موتتك يا شيخ كم تبكي عيون
يا الله عساك لجنة الخلد سيده
اللي بكو من فقدتك ما يلامون
ما ينّسي راعي الفعول الحميده
كلٍ على فرقاك يا شيخ محزون
وأنا حزن قلبي يقص الحديده
ترى الأجل محدود مهما تقولون
سبحان منهو صرفت الخلق بيده
لو تجتمع كل البشر ما يردون
أمر الولي ينفذ على ما يريده
كم من فقير جاه معسر ومديون
قضا حلاله ما بقاله شريده
ثم راح متغاني ويشكر وممنون
بعد الفقر صارت حياته سعيده
وان شاف ضيفان على البيت يلفون
يفرح ولا عمره يمد الزهيده
بيته مقر للعرب ما يصدون
ابو فهد عز الرفيق وعضيده
يا الله يا معبود يا خالق الكون
يموت مخلوقك وتقدر تعيده
يااللي جميع الناس لأجلك يصلون
اجعل مقره في الجنان المديده
شعر - سحيم بن فهد بن سحيم القحطاني