النّار مشبوبة لها شكلٍ بديع والخوف كل الخوف لاتحدث حريق

يا زِينها شَبِّتك للنّار
من حولها اخلص الاحباب
ذِيَّه عوايد الاخيار
رِحْم ومحبه وجمع احباب
مِن طِيبهم ذِكْرهم انوار
وعبر الزمن للهموم اطباب
سعود عائش الحربي - جدة
في جلسةٍ في البر في برد الربيع
ومصوِّرٍ كنّه على الجلسة يويق
أحدٍ على الجوال خايف لا يضيع
عنه الخبر واحدٍ يسولف مع رفيق
والنّار مشبوبة لها شكلٍ بديع
والخوف كل الخوف لاتحدث حريق
يا زين بعض احيان هالجلسة جميع
اللي على الطُّولة تعين ولا تعيق
محمد مقحم المقحم - الرياض
تسعة عشر صفوا على صالي النّار
في ليلةٍ فيها صفى الجو مكشات
بعيدٍ عن الضوضا وعن كل الأخبار
تسامروا والبرد خيم عليهم بنسمات
ودارت سوالف بينهم دون اسرار
ناس تصافوا كلهم جمع ورفاقات
حمد عبدالله الوايلي - حوطة سدير
جمعة رفاقه شوفها يبرد الجاش
والحقد فيما بينهم ما دروبه
اخوان وقرابه الغلاء بينهم كاش
ولامن لفاهم ضيف حيل فرحوا به
خالد بن ناصر المخيمر - روضة سدير
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق ‫‬