بيت وصدى

كتب بيت الاسبوع الماضي الشاعر علي برجس المصقر من الرياض ويقول :
المترو اللي نجاحه زين
فك الزحام وتريحنا
وكان صدى البيت من الشعراء:
يارياضنا جاك شي زين
راح الزحام وتريحنا
في ربع ساعه واقل شوين
الوجهه اللي لها رحنا
خالد ابراهيم المرشود- الرياض
تحقق الحلم يالغالين
وركبت مترو من اصبحنا
ودوجت به بين جيم وسين
من سرعة له تطايحنا
علي مونس الجدي - الرياض
ياليت قدم لنا من سنين
فعلا فخر حيل وافرحنا
يازين مشيه بلا بنزين
عزالله انا تريحنا
عواد خلف الشمري - الرياض
نسمع بطاريه طاري زين
برياضنا صار وافرحنا
وجده تبي واحد واثنين
هذا من اكبر مرابحنا
سعود عايش الحربي - جده
الله على وارد الستين
ياما لشوفه تناوحنا
واليوم جا مترو الالفين
قرب علينا مشاوحنا
خالد فرحان العنزي - الرياض
قطار كهربْ يشوق العين،
عزّ الله انّا به افلحنا.
يريّح الناس من أمرين،
زحمةْ وبنزين إلى رحنا.
بآخر شهر أربع وعشرين،
صار افتتاحه وفرّحنا.
والقوة العاملةْ وافين،
بالعلم حنّا تسلّحنا.
محمد مقحم المقحم-الرياض.
وعلى وزن آخر :
يا الله تجعلنا من الشاكرين
على التقدم ذا حصل في وطنا
نوصل مقاصدنا و نحنُ سريعين
جات الحضاره يا عرب في زمنا
الحمد لله عشت انا ايام وسنين
اربع وسايل نقل مرت علينا
النوق و الموتر و بالجو ماشين
و اليوم با المترو لبيتي وصلنا
محمد عبدالله الشهري/مكة المكرمة
بيت الاسبوع
بيت الاسبوع للشاعر زيد العتيبي والذي يقول :
من طعنة اللي تحبه ليش مستغرب
اغلب جروح البشر من واحد غالي
نستقبل صدى البيت المطروح خلال ثلاث ايام من نشر البيت المطروح
على إيميل الصفحة:
rb-khozama@alriyadh.com