تكفون بروا والديكم على شان لاجا سداد الدين عندك رصيدي

بيت الأسبوع السابق كتبه للصفحة الشاعر عيد الغضوري والذي يقول:
تكفون بروا والديكم على شان
لاجا سداد الدين عندك رصيدي
ونشكر جميع الشعراء الذين أمتعونا بالأصداء الجميلة:
حقوقهم تكبر مع الوقت لاحان
واجبهم خل برك فيهم يزيدي
ابواب جنه ترزقك خير واحسان
ترى الحياة ايام وبعده وعيدي
والدين مردود على كل انسان
وعند الولي لا بد تلقى مزيدي
يالله ترحمهم وترزقهم جنان
والحي منهم فيه عمر مديدي
حمد عبدالله الوايلي - حوطة سدير
سمات فالانسان ولديّن عمدان
تجعلكم جنات وعمر ٍ مديدي
في والديكم بروْ من غير نقصان
تكفون ثم تكفون لا احد ٍيحيدي
ياللي تيون من احمر النار مزبان
حضوا عليهم بالوفاء والمفيدي
ما غيرهم اولا من الناس باحّسان
والله على ماقول اكرر واعيدي
مشعل بن صنت العصيمي - الخرج
من عق بأمه ماربح يوم خسران
ومن برّها بي يعيش عمره سعيدي
يدرى الخواطر يخفض الصوت ويبان
ومن عقّها ياناس وش يستفيدي!
والأب ذاق المر في بعض الأحيان
شال الحمول وجاب كل الجديدي
عبدالكريم إبراهيم ابن خزيّم - البكيرية
أبناؤكم عقب البريرة والإحسان،
تبرّكم يا سامعين القصيدي.
وايضا من الله يرجي العبد غفران،
إذا عمل بأمره لكل العَبيدي.
إذكر وش اللي تمّموا ذيك الأزمان،
من شان تصبح في حياتك سعيدي.
كم واحدٍ من برّ أهيله والإخوان،
صارت له الدنيا على ما يريدي.
محمد مقحم المقحم - الرياض.
يا عيد بيتك له دلايل وبرهان
عساه ينفع للقريب أو بعيدي
الوالدين أوصى بهم رب لحسان
من برّهم تلقاه عايش سعيدي
عند البشر للوالديني مكان
الله فرضها فالكتاب المجيدي
من برهم يسعد بتال الزمان
وياتي من أولاده علومٍ تفيدي
محمد عبدالله الشهري - مكة المكرمة
بيت الأسبوع
كتب بيت الأسبوع المقبل الشاعر حمد عبدالله الوايلي
من حوطة سدير ويقول:
ياناس ياللي تفهمون المعاني
الجار له حق عظيم على الجار
نستقبل صدى البيت المطروح خلال ثلاث أيام
من نشر البيت المطروح
على إيميل الصفحة:
rb-khozama@alriyadh.com