هذا صغير السن لكن عزمه كبير خيال من صغره ويسرج على الخيل

بالبطل يا فرحنا يا سعدنا
لازمِ نْواجه حضوره بالنشيد
الفروسيّةْ تراها عندنا
نْتوارثها حفيدٍ عن حفيد
أبْعَدَ التاريخ عنّا أو دنا
ما نسينا مجدنا الماضي التليد
يوم هي كانت وسيلةْ جندنا
قبل تأتينا المدافع والحديد
طابت الدنيا وطبنا مَعْدِنا
والوفا للخيل موجود وْيزيد
محمد مقحم المقحم - الرياض
شبل ن على الخيل يتدرب
واكيد مع التدريب بيكون خيال
مولع ن في حب الخيل ما قال آجرب
يمشي على اثار اجداده طيب الفال
لروحن بالميدان مع قايد السرب
يبي يفوز بالكاس ويجيب الاموال
صالح البشري
نعرف حديث النبي بالخيل ويش معناه
تعليم لولاد ركب الخيل و البندقيه
من فوق قُب الخيول الفاتحين غُزاه
باالصافنات المغيره ضد قومٍ شقيه
خالد على ضهرها كم واحدٍ ذكاه
با السيف الاملح صناعاته دمشقيه
محمد عبدالله الشهري- جبل اثرب
كفو عليك ياللي على الخيل اسرجت
في يدك الخطام وناوي لك بدوره
توك صغير وللمفاخر تفاخرت
وحطيت لك بوسط الخزامى احلى صوره
شافك ابوك وقال يا ولدي ابدعت
شجاعة الابطال ماهي محصوره
مستقبلك زاهر وللعليا تشجعت
الله يفكك من غدر الزمان وجوره
خالد بن ناصر المخيمر. روضة سدير
الفارس الوَاعِد على صهوة جوادِ
ما يفرقِه عَن مِحتِرِف كُود عمره
وحُب الجياد معروف مِن عصر عاد
وبكل البسيطه ذِكرها عاليٍ قدْره
ولها بذكر الله سوره وامجاد
وحربٍ وسلمِ دورها واضحٍ امره
سعود عائش الحربي .جدة
هذا صغير السن لكن عزمه كبير
خيال من صغره ويسرج على الخيل
لوح على ظهر الحصان ناوي يسير
ويازين شوف الصغير يطلق الحيل
ميل يبي الصوره عسى فاله الخير
مستقبله مشرق في صورة الجيل
حمد عبدالله الوايلي . حوطة سدير
صورة العدد
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com