مهرة .. وخيّالٍ يمارس هوايات بأرضٍ جميله ماطرٍ أرضها سيل

خيالنا ضاري على صهوة الخيل
لو كان خيله جاير في مسيره
الخيل من ركابها قول قد قيل
مهارة الفرسان في كل ديره
الله يعدلها عن الضلع والميل
ويجعل جميع احوالنا مستنيره
علي الرشيد - رياض الخبراء
يوم الحروب الفايته والفتوحات
ظهور الأصايل يعتليها الرجاجيل
واليوم من أبرز هواة الرياضات
غير السباق تمتعك بالتشاكيل
مهرة .. وخيّالٍ يمارس هوايات
بأرضٍ جميله ماطرٍ أرضها سيل
سعود عبدالعزيز الهزاع - نعام
خيّال وتستاهل بعد قول خيّال
ياللي على ظهر الفرس لك مهابه
تستعرضه فوق الرمل مثل الابطال
من واجهك بالحرب لا واعذابه
خالد ناصر المخيمر - روضة سدير
للخيل قيمه مع محبه قديمه
ياما تذكرنا بصقر الجزيره
رجل بنا الأمجاد بحنكه عظيمه
عسى جنان الخلد دايم مصيره
قاد السفينه بحنكته والعزيمه
صقر على اسمه له مكانه كبيره
واليوم لدار العز فضل وقيمه
في ظل ابو فهد نعمنا كثيره
محمد عبدالعزيز الخنيفر - أشيقر
امسك تجوّد فوق ظهر المهره
الخيل جامح رافع من زوره
ومن فزته طير عسام الغبره
وسط النفود وجرته ماثوره
زاد الصهيل معزز بالحسره
وجود زمامه خلها مستوره
لاطحت والله ما تفيد العبره
ما كل خيال يجي في دوره
حمد عبدالله الوايلي - حوطة سدير
فارس على حصانه بتدريب فرسان
من كل وجهٍ رايعٍ في جماله
قوّه وسرعه مع حلا فيك يا حصان
أيقونة المضمار رمز الاصاله
وصفحة التاريخ في كل الأزمان
رمز الأصاله والوفاء والشكاله
ياما اعتلوا سرجك بالإسلام شجعان
وحققوا للنصر حاله.. وحاله
سعود عائش الحربي - جدة
للخيل ذكرى للرجال الوفيين
ياما لها في ذيك الأزمان صولات
في نعمة بالأمن من ذيك السنين
بجهود صقر يا عسى وسط جنات
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com ويا هلا..
صورة العدد
Your browser does not support the video tag.