إن كان ودك خاطرك دوم منساح وفي داخل صدور الخلايق تملك

كتب بيت هذا الأسبوع للصفحة الشاعر فيصل العطيشان، ويقول:
إن كان ودك خاطرك دوم منساح
وفي داخل صدور الخلايق تملك
وكان صدى البيت من الشعراء:
لا تتبع النمام خليك مرتاح
لو كان تجلس للأبد في محلك
احسن من الممشى مع شخص جراح
يجرح بمنطوقه صديقك و خلك
و اتبع رجال الطيب ضاوي وسراح
وخلك معاهم مثل ظلّي و ظلّك
و خلك لخلق الله كما عود فواح
من بعدها حتى العدو مخلصٍلك
محمد عبدالله الشهري - جبل اثرب
ياجتني ابيات الوفي خاطري ساح
ابومحمد ياتعومست دلك
يقول كانك ناوي اليوم ترتاح
خلك مع اللي مثل شرواك خلك
والا الردي ماهو زبونن للامداح
عن قرب مثله عزك الله واجلك
عبدالعزيز الصقيري - حايل
ابي اتحيزم للمجاراة بوشاح
لا صار هرج العوج دربه مبلك
والبعد ينفع عن مهابيل وطياح
ناس على اسرار الخلايق تهلك
والله جعل للخير مدخل ومفتاح
حفظ الكتاب وسنته والعمل لك
خلف مهنا الشمروخي
كل الملا فيهم شقي ٍ ومرتاح
وفيهم وساع صدور وناس ٍ تعلك
في كل ساحه تاجد احزان وافراح
هذاك يفرح بك والآخر يملك
لكن خل الصدر واسع ومزاح
لاجيت لك جمعا تبسَّم وسلك
لو كان ميزانك رفيع ٍ ولاطاح
ساير مجال الجيل بكل التفلك
مشعل بن صنت العصيمي/الخرج
ضميرك إن بغيت والبال يرتاح
والناس أكثرها دوامٍ تِجِلَّك
خلَّك لهقوة مِن وِثق فيك سمَّاح
وهرج الرِّدى احذر يِجِد مدْخلٍ لك
ون كان عيبٍ مِن عيوب البشر لاح
لك الحذر تِبديه00 صندوق خَلَّك
والرَّجل لا مِن فيه طاح الأمل طاح
واقرب رفيقٍ بالمخاليق ملَّك
سعود عائش الحربي - جده
خلك كريم اليد تسعى بالإصلاح
تكسب جميل ويقال لله درك
وعمود دينك ويل عينك ليا طاح
تصبح سعيد صدق والحلم دلك
وتحس لذه في سجودك وترتاح
يطيب حظك والبشر ما تذلك
تبقى بخير وعنك الهم ينزاح
هذا الرصيد وللمخاليق سلك
صالح البشري - الفويلق
بيت الأسبوع
أرسل الشاعر مشعل بن صنت العصيمي من الخرج، ويأمل طرح البيت أدناه للمجاراة خلال الأسبوع القادم.. ويقول فيه:
أسبوع نطوي عام ويدخل لنا عام
عام ٍ جديد وجعل مقدامه الخير
نستقبل صدى هذا البيت بأربعة أبيات خلال ثلاثة أيام من نشر البيت على إيميل الصفحة:
rb-khozama@alriyadh.com